Boqolaal dad ah ayaa maanta ka dhigay magaalada Gaalkacyo banaan-bax ballaaran oo lagu cambaareynayey dacwadda calooshood u shaqeystaasha Somaliland ka soo jeeda ay u heystaan wasiirkii hore ee gaashaandhigga Somalia Gen: Maxamed Cali Samatar.
Banaan-baxa oo ay soo qaban-qaabiyeen ururrada bulshada rayidka u dooda ayaa waxaa ka soo qeybgalay siyaasiyiin, waxgarad, odayaal dhaqameed,haween, dhallinyaro iyo qeybaha kale ee bulshada ku dhaqan Gaalkacyo, dadweynaha oo watay boorar ay ku qornaayeen hal ku dhigyo ka dhan ah dacwadda iyo sawirrada Samatar ayaa ku qeylinayey erayo lagu cambaareynayo dowladda Mareykanka iyo shakhsiyaadka dacwadda wada.
‘’Mareykan ha dhaco, Somaliland dooni-meyno, qof kasta oo Somali necab guuldarro ayaa kuu dambeyn doonto’’, iyo kuwa badan oo kale ayaa kamid ahaa wixii ay dadku ku qeylinayeen.
Qaar kamid ah banana-baxayaasha ayaa sheegay in dacwaddan ay tahay been abuur la soo dhoo-dhoobay oo diblamaasi sare oo wadan kale magangalyo u jooga lagu haleynayo sharaftiisa, iyagoo ku baaqay in ay jiraan dad badan oo galay dambiyo ka waa weyn kuwa lagu eedeynayo Gen: Maxamed Cali Samatar kuwaasna la soo taago Maxkamadda.
Waxay tusaale u soo qaateen Axmed Siilaanyo madaxweynaha hadda ee Somalia iyo kii ka horeeyey ee Daahir Riyaale Kaahin oo ay sheegeen in ay iyaga laayeen reer waqooyiga.
Maxkamad ku taalla Mareykanka ayaa oggolaatay in dacwad lagu soo oogi karo Cali Samatar oo mar ahaa madaxweyne ku xigeenkii Somalia berrigii dowladdii kacaanka iyadoo lagu eedeynayo qeybtii uu ku lahaa duqeyntii gobolada waqooyi ee dalka loo geystay sanadkii 1988-dii markii kooxihii nabad-diidka ee SNM ay damceen in ay dalka kala qeybiyaan.
Somalida dal iyo dibad way ka soo horjeesteen dacwaddan, waxaana haatan socda qorshe lagu hor-istaagayo maxkamadeynta mas’uulkan.
Axmed Sujuu
Boosaaso.
