Xukuumadda oo Xabsiga Dhigtay Maayirkii Laascaanood iyo Sababaha loo aanaynayo Xadhigiisa
Laascaanood(Waaheen)- Ciidamada Bilayska ee Magaalada Laascaanood ayaa shalay Galabtii Xabsiga u taxaabay Maayirkii Degmada Laascaanood ee Xarunta Gobolka Sool Axmed Daahir X. Xasan, kaasoo lagu eedeeyay inuu faraha kula jiray falal ka dhan ah Somaliland oo ay wadeen odayaal ka soo jeeda beeshiisa.
Maayirka oo shalay galabtii laga qabtay Huteel la yidhaahdo Dalxiis oo ku yaala gudaha Magaalada, waxa isla xalayba loo dhaadhiciyay Xabsiga dhexe ee Magalaada laascaanood, halkaasoo uu ku jiro sida ay xalay saacadihii dambe wararku nagu soo gaadhayeen, inkasta oo warar aanu helnay ay sheegayeen in isla xalayba Xildhibaano iyo Odayaal uu aabihii ku jiro oo ku sugan Hargeysa ay madaxtooyada u tageen sidii loo sii dayn lahaa.
Axmed Daahir X.Xasan oo ay Xidid dhaw yihiin Wasiirka Madaxtooyada Somaliland Xirsi X. Cali Xasan, si rasmiya looma oga waxa lagu soo eedeeyay,balse sida ay sheegeen ilo ku dhaw-dhaw oo aanu la xidhiidhnay waxa xadhigiisa amray Wasiiro Xukuumadda ka tirsan, gaar ahaan Wasiirka Warfaafinta iyo Ganacsiga oo ku sugan magaalada Laascaanood, kuwaasoo amar ku siiyay Taliyaha qaybta Bilayska iyo Guddoomiyaha Gobolka Sool in la soo xidho Maayirka, waxaanay sida ay ila wareedyadaasi noo sheegeen ay wasiiradani xadhigiisa ku nisbeeyeen in uu lug ku lahaa shir ay dhawaan beeshiisu kaga arinsanayeen dad ay ciidanka qaranka Somaliland u soo qabqabteen falal argagixiso oo loo soo dhaadhiciyay Xabsiga Mandheer oo ka dhacay Degmada kalabaydh.
warar kale oo aanu xalay ka helnay xadhiga Maayirka ayaa sheegay in lagu eedeeyay falal Musuqmaasuq oo uu galay, kuwaasoo uu ku lunsaday lacag lagu qiyaasay 350.000000 Milyan(saddex Boqol iyo Konton Milyan Slsh), taasoo loogu talo galay in Mashaariic horumarineed lagaga fuliyo Gobolka, gaar ahaan degmada laascaanood.
Badhasaabkal iyo Taliyaha qaybta Bilayska ee Gobolka Sool oo uu Wargeyska Waaheen la xidhiidhay si uu xadhiga Maayirka wax uga waydiiyo ayaanay u suurto gelin, ka dib narkii ay qaban waayeen talefoonadooda gacanta oo aanu ku cel celinay.
