Ciidamo ka tirsan xarakada Al-Shabaab ayaa dab qabadsiiyay in ka badan toban guri oo isugu jira goobo ganacsi iyo guryo ku yaalla degaanka Garas Bintow oo u dhaxeeya degmada Balcad iyo magaalada Muqdisho.
Wararka ayaa sheegaya in ciidamada xarakada Al-Shabaab ay tageen guri ku yaala degaanka Garas Bintow, halkaasi oo uu degenaa nin shalay dilay toorey la dhacay ilaa inta uu ka geeriyoodana ku waday nin oday ah oo lagu magacaabo Maxamuud Xasan Giirey, kaasi oo toorey ruuxa uga qaaday horjoogihii Al-Shabaab ee wadada u dhaxeysa degmada Balcad iyo Muqdisho laguna magacaabi jiray Cali Xoosh.
Xiisada u dhaxeysa xarakada Al-Shabaab iyo dadka degaanka Garas Bintow oo maalinba maalinta ka dambeysa sii kordheysa ayaa la sheegayaa in ciidamada Al-Shabaab markii ay tageen guriga ninkii odayga ahaa ee isagu dilay horjoogihii wadadaasi u qaabilsanaa Al-Shabaab markii ay waayeen caro darteed u gubay dhammaanba nawaaxiga gurigii uu degenaa odayga.
Sida ay sheegayaan dadka degan Garas Bintow dilka horjooge Cali Xoosh ayaa yimid kaddib markii uu u yimid ninka odayga ah ee lagu magacaabo Maxamuud Xasan Giirey uu afur u sameynayay dadweyne ka qeyb qaatay aaska haweeney ayeeyo u ahayd Maxamuud Xasan Giirey oo iyadu geeriyootay maalinimadii doraad ahayd.
Horjooge Cali Xoosh iyo odayga dilay oo lagu magacaabo Maxamuud Xasan Giirey ayaa iyagu ilmo adeer ahaa, waxaana horjoogaha laga dalbaday inuu isaga tago halkaasi hase yeeshee amar ku bixiyay in guriga ay geerida ka dhacday aan lagu duceysan karin isla markaana la damiyo dabka waxna aan lagu karsan karin.
Shaqaaqada arrintaasi ka dhalatay ayaa la sheegayaa inay galaafatay nolosha horjooge Cali Xoosh oo isagu dhaawacay wiil uu dhalay Maxamuud Xasan Giirey oo lagu magacaabo Xasan Maxamuud Xasan Giirey, kaddibna odayga uu la dhacay Toorey dhowr goorna ka geliyay xubnaha muhiimka ah ee jirkiisa, taasi oo sababtay inuu isla goobtaasi ku geeriyoodo, waxaana horjoogaha laga qaatay Bastoolad iyo laba qori.
Lama oga ilaa iyo iminka sida xaaladu noqon doonto, iyadoo xaaladda degenaansho ee ka jirta degaanka Garas Bintow ay tahay mid aad u kacsan, isla markaana dadkii ku haray halkaasi ay soo wajahday xaalad cabsi iyo welwel ay ka qabaan in waxyeelo uga timaado ciidamada careysan ee Al-Shabaab oo iyagu iminka colaad cusub u qaaday dadka degaanka.
