Wasiirka Arrimaha Gudaha Duur Oo Shaaca Ka Qaaday Inay Xukuumaddu Qabatay Ciddii Ka Danbaysay Falkii Saameel Dilkana Ku Tilmaamay Mid Aan Nabadgelyo Darro Ahayn
December 9, 2011
By staff-reporter
Wasiirku waxa uu sheegay in shaqaaqooyinkii Ceerigaabo ka dhacay iyo ta ka dhacday degmada Saameel ay xidhiidh leeyahiin “qaabka la iskugu soo beegay anagoo tii Ceerigaabo ka soo noqonay soo dhamaystiray, beelahii heshiisiinay ayaa tanna dad dan gaar ah ka lahi ay sameeyeen, eeg tabta iyo xeeladda waxaa la bartilmaameedsaday beelo muddo xasillooni, nabadgelyo iyo walaalnimo dhex taallay” ayuu yidhi Wasiirka Daakhligu
Hargeysa (Halbeegnews)– Wasiirka Arrimaha Gudaha Somaliland Maxamed Nuur Caraale Duur oo maanta weraysi ku siinaayey xafiiskiisa magaalada Hargeysa Telefishanka afka Xukuumadda ku hadla, ayaa shaaca ka qaaday inay gacanta ku dhigeen cidda loo tuhmayo inay ka danbeeyeen falkii lagu dilay seddexda qof ee ku dhintay degmada Saameel ee u dhexeysa degmooyinka Gabiley iyo Dila.
Wasiirka Arrimaha gudaha Somaliland oo sharaxaad ka bixinaya dadkaasi la qabtay qaybaha ay u qaybsamaan wuxuu yidhi “dadka aanu hadda hayna dhawr qaybood ayey iskugu jiraan, qaar aanu ku tuhmayno inay falkaasi ka danbeeyeen oo ay gacanta ugu weyn ku lahaayeen oo ay iyagu abaabuleen, qaar aanu u qabanay qaab odaynimo ah oo ka mid ah dhinacii la eedaynaayey iyo qaar ka mid ah warbaahinta oo hadalo kicin ah sameeyey” ayuu yidhi Wasiirka arrimaha gudahu.
Wasiirka oo aan faah-faahin ka bixinin ama magacaabin shakhsiyadaha ay u qabteen falkani ee ka danbeeyey dilkaasi deegaanka Saameel ee Ceelbardaale ayaa wuxuu sheegay in ay yahiin eedaysanayaal danbigaasina lagu soo caddayn doono, wuxuu sidoo kale Wasiirku sheegay in shaqaaqooyinkii Ceerigaabo ka dhacay iyo ta ka dhacday degada Saameel ay xidhiidh leeyahiin “qaabka la iskugu soo beegay anagoo tii Ceerigaabo ka soo noqonay soo dhamaystiray, beelahii heshiisiinay ayaa tanna dad dan gaar ah ka lahi ay sameeyeen, eeg tabta iyo xeeladda waxaa la bartilmaameedsaday beelo muddo xasillooni, nabadgelyo iyo walaalnimo dhex taallay” ayuu yidhi Wasiirka Daakhligu
Wasiirka oo la weydiiyey in lagu eedaynaayo Xukuumadda uu ka tirsanyahay inay ammaankii dalka ka seexatay wuxuu ku jawaabay in kooxo uu ku tilmaamay Odayaal siyaasadda ku hadhay iyo Urur yar yar waa sida uu hadalka u dhigaye oo socod barid ahi Xukuumadda aanay u tilmaamayn amaanku wuxuu yahay “kollay waan maqlaayey qaar odayaal ah oo siyaasadda berri hore ku hadhay iyo ururo yaryar oo socod barid ahi meelahaasi ay waxaasi ka lahaayeen, waar anaga ammaanka dalku na saaranyahay idinkana og, nabadgelyo darro dalka kama jirto, dil ayaa dhacay dilkuna maaha nabadgelyo darro meel walbana wuu ka dhaca, meelaha ugu nabadda badan ayuu ka dhaca” ayuu yidhi.
Wasiirku wuxuu si dadban ugu eedeeyey dhinaca gobolka Awdal inay kaga baxeen ballan ayuu yidhi ay Xukuumaddu kula gashay in markii falku dhacay sii aanay dhib danbe u dhicin balse ayuu yidhi dhimasho kale dhacday maydkaasi oo lagu aasay Gabiley.
Hadalka Wasiirka oo aan caddayn cidda ay hadda u qabteen falkani ayaa ilaa hadda inta la ogyahay ee ay Xukuumaddu falkani u qabatay waxaa ka mid ah La Taliyahii dhinaca siyaasadda ee Xukuumadda Madaxweyne Siilaanyo Abiib Diiriye Nuur Timacad, Sheekh Maxamuud Raage iyo Odayaal ka soo jeeda deegaanka Gabiley ma cadda dhinaca uu ula jeeday Wasiirku inay yahiin dadka lagu hayo danbiga ah inay fakaasi ka danbeeyeen.
source Awdalpress
