Shirka Garoowe oo lagu waday in shalay oo Jimco ah la soo afjaro madaxduna u kala duusho meelihii ay ka kala imaadeen ayaa mid ka mid ah qodobada shirka la isku qabtay.
Inta badan natiijada ama warmurtiyeedkii shalay la filayay in lagu dhawaaqo ayaa dib u dhacay markii si weyn la iskaga hor yimid qododbka ah in 4.5 xildhibaanada lagu qeybsado iyo goboleysi lagu qeybsado.
Dowlad Goboleedka Puntland madaxdii uga qeybgashay shirka ayaa ku adkeystay inaan loo baahneyn 4.5 iyagoo ku tilmaamay inuu yahay kan Soomaaliya mushkilada ku haya.
Madaxweynaha Dowlada KMG ah Soomaaliya Sh.Shariif iyo Madaxweynaha Galmudug Maxamed Calin iyo Hogamiyaha Ahlusunna Sh. Maxamed Aw-libaax ayaa isku fikrad noqday iyadoo ku adkeystay in sidii hore 4.5 wax lagu qaybsado taasoo keentay in shalay dib loo dhigo soo afjarida shirka welina wuu taagan yahay murankaasi saaka.
Waxyaabaha la isku raacay waxaa ka mid ahaa in xildhibaanada dib u habeyn lagu sameeyo tirada guudna laga dhigo 225 mudane sidoo waxaa la isku raacay sameynta dastuur dalku yeesho.
Si kasta waxaa shalay baaqday warmurtiyeed shirka laga soo saari lahaa xili madaxda sar sare ee shirka fadhida iyagana ay baajiyeen safaro ay dib uga dhoofi lahaayeen Magaalada Garoowe,wararka ugu danbeeya ee aan saaka heleyno ayaa sheegaya inay suurtagal tahay in Puntland iyo inta kale ay soo dhexgalaan ergooyinka Qaramada Midoobe ee shirka ka qeybgalaya si maanta shirka loo soo afjaro kadibna gudiyo dhameystir sii wadi doonaan taaba gelinta shirka.
Maxamed Cabdilahi Muuse
Freelance Journaist.
