Laascaanood (Waaheen) – Tiro ka mid ah Maleeshiyaadkii taabacsanaa Kooxda Nabad-diidka ah ee Khaatumo la baxay iyo hal gaadhi oo wateen ayaa u soo goostay dhinaca ciidamada qaranka ee ku sugan duleedka Magaaladda Laascaanood ee xarunta gobolka Sool.
Maleeshiyaadka kooxda Khaatumo ee u soo goostay dhanka ciidamada Qaranka ayaa wata hal gaadhi oo tikniko ah oo uu ku rakiban yahay qoriga loo yaqaano B 10, kaasi oo wateen Maleeshiyaad tiradooda lagu sheegay ilaa 8 nin iyo hubkoodii.
Maleeshiyaadkan iyo gaadhiga Tiknikada ah ee ay wataan ayaa u galay ciidamada Qaranka ee fadhiisimada ku leh koonfurta Magaaladda Laascaanood, iyagga oo isku dhiibay ciidamada Qaranka, ka dib markii ay ka il-waayeen Nabad-diidka Khaatumo ee dhibaatada ka wada aagaga Buuhoodle Iyo Sool.
Gaadhigan ayaa ka mid ah afar gaadhi oo la sheegay in qurba-joogta nabad-diidka Khaatumo iibiyeen sanadkii hore, kuwaasi oo ay gacanta ku hayaan Maleeshiyaad ku sugan deegaanka Boocame, kuwaasi oo laftooda la filayo inay dhawaan u soo goostaan dhanka ciidamada Qaranka Somaliand ee jiidaha hore ku sugan.
Maaha markii ugu horeysay ee Maleeshiyaadka Khaatumo u soo goostaan dhanka Somaliland, balse waxa hore u jiray Maleeshiyaad iyo gaadiid badan oo u soo goostay dhanka ciidamada Qaranka, waana tallaabooyin muujinaya buburka ku yimid nabad-diidka Khaatumo ee dhibaatada isugu urursaday Taleex.
