Taliyihii Saadka Jabhadda Raaskambooni Oo Caawa Dhaawac U Geeriyooday
Published on June 29, 2013 by Xuseen Cabdi · 6 Comments
Kismaayo(AGGM) Taliyihii Saadka Iyo Saanadda Jabhadda Raaskambooni Cabdulqaadir Sareer Maax oo la dhashay Afhayeenka Jabhadda Raaskambooni oo maanta dagaaladii cuslaa ee ka dhacay Magaalada kismaayo dhaawac culusi ka soo gaarey ayaa la sheegayaa inuu u geeriyooday dhaawacaasi.
Sarkaalkan ka tirsan Jabhadda Raaskambooni ayaa shaacinaya inuu caawa ku geeriyooday Isbitaalka ciidamada kiiniya ku leeyihiin garoonka diyaaradaha,waxaana la sheegayaa inuu sarkaalkaasi ku dhaawacmay dagaalo culus oo ciidamada Bare hiiraale ku qaadeen naawaxiga Warshada Hilibka oo ay galabta dib ula wareegeen ciidamada Col Bare Hiiraale.
Sarkaalkan ayaa la sheegayaa inay xabad ka haleeshay madaxa isla markaasna uu dhaawac culus soo gaaray,waxaana la xaqiijinayaa inuu caawa ku geeriyooday isbitaalka ciidamada Kiiniya ee Garoonka diyaaradaha halkaasi oo xaaladiisa caafimaad lagula tacaalayey,waxaana la sheegayaa inuu geerida sarkaalkan saameyn ku yeelatey jabhadda Raaskambooni intii galabta dagaaladu socdeen isla markaasna ku khasabtey in goobahaasi dib uga cararaan.
Dhinaca kale xaalada kismaayo ayaa ah mid kacsan iyadoo shacabka magaaladu ka yaaban yihiin sababta ciidamada kiiniya madaafiicda ugu garaaceen xaafadaha magaalada kismaayo isla markaasna ula soo safteen ciidamada jabhadda Raaskambooni,waxaana la aaminsan yahay in ciidamada kiiniya naf bidayaan jabhadda raaskambooni.
Ugu dambeyntii waxaa mar kale maalinimada beri ah laga cabsi qabaa in dagaalo hor leh dib uga qarxaan maadama kooxaha ku dagaalmaaya gudaha magaalada kismaayo yihiin kuwo doonaya inay qoloba qollada kale banaanka uga saarto,waxaana dhibaatada ugu weyni ka soo gaareysaa shacabka soomaaliyeed.
