War ay na soo gaarsiiyeen shaqsiyaad diblumaasiyiin ah oo magacooda ka gaabsaday ayaa sheegaya in Yussur Abraar oo dhowaan loo magacaabay Guddoomiyaha bangiga dhexe ee Soomaaliya, iskana casishay xilkaasi markii sida ay sheegtay lagu qasbay in ay saxiixdo dukuminti dowladda Soomaaliya ay ku dalbaneyso in lacagihii bangiyada caalamka u yiilay Soomaaliya lagu soo wareejiyo, iyadoo Yussur ka hortimid dalabkaasi, sheegtayna inay saxiixeyso waraaqahaasi keliya haddii lacagtaasi ay ku soo dhaceyso qasnada bangiga dhexe.
War hadda na soo gaaray ayaa sheegaya in Yussur Abraar ay ku sugan tahay Xerada Xalane ee ku dhow Garoonka dayuuradaha, iyada oo ay wehliyaan saraakiil ajnabi ah, waxaana ilaha wararka na soo gaarsiiyeey ay tilmaamayaan in dowlado shisheeye oo aan la carabaabin kuwa ay yihiin in ay la soo xiriireen Madaxweynaha & R/wasaaraha ayna ka dalbadeen n Guddoomiyaha bangiga dhexe loo madax-banneeyo shaqooyinkeeda.
Is-casilaada Yussur ayaa dhabar jab weyn ku noqday dowladda Soomaaliya, waxaana iyada oo Dubai-UAE joobta ay sheegtay Yussur in sababaha ay isu-casishay ay ugu weyneyd hanjabaad uga timid xubno qaraaba la ah Madaxweynaha, oo sida ay sheegtay ugu hanjabay in ay dilayaan haddii ay ka dhega-adeegto dalabkooda.
Shabakadda Dayniile oo dedaal dheer u gashay si ay u ogaato xogta rasmiga ah ee ku saabsan dib ugu soo laabashada Muqdisho ee Yussur waxey akhristayaasheeda u balanqaadeysaa in ay u soo gudbiso macluumaadka sax ah.
