Waxey xukunka kala wareegeen rag shan sano cayiliyay shabaab una ogolaaday iney lacag baad ah ka qaataan albaab kasta oo furan, sanadkii 2020 illaa bartamihii 2021 waxey shabaabku ka aruursadeen lacag gaareysa 180 milyan oo dollar kaliya Muqdisho iyo labada Shabelle, waxaa usii dheeraa iney ka baaqsadeen kooxdaasi guluf kasta oo dagaal ka dhan ah Shabaabkii si xor iyo cabsi la'aan ah ugu fidayay unug kasta oo bulshada ah, illaa ay gaareen heer ay lacag ka qaataan from Dakadda illaa Hooyo biilkeeda ka raadsata hal neef Ari ah oo ay subax kasta qasho kana iibiso macaamiil yar oo deriskeeda u badan.
Haba quudiyaan ma xumee, laguma xushmeen in laga joojiyo qaraxyada ay kooxdaas ku gumaadday shacabkii ay masuulka ka aheyd dowladdii hore, arinta ugu darana waa in sanadkan bilowgiisii la saadaalinayay in sidii Afgaanistaan oo kale Shabaabku ula wareegi karaan awoodda dalka maadaama ay iska dhiseen dhinac kasta oo dhaqaale iyo ciidan iyo iclaam intaba.
Lix bilood oo weli dhamaan ayaa gebi ahaan waxa is badalay qaabkii dowladnimada iyo dhiiranaanti shabaab oo waxey isku rogtey dhanka kale, xaalkii ayaa hadda noqday Dowlad weerar ah iyo Shabaab baxsad ah, saddax qodob ayaana udub dhexaad looga dhigay, (Dagaal Milatary, mid dhaqaale iyo mid caqiiddo oo lagu dhisayo wacyiga bulshada) nasiib wanaag saddaxdaba waxaa kasoo ifay yididiilo iyo guulo muuqda oo miro dhalay, haddi ay sidaan kusii socdaana waa hubaal in sanadka 2023 noqon doono mid lagu xuso oo lagu xasuusto cirib tirkii Shabaab inshallah.
Dabcan Shabaabka uma laabna gacmaha oo waxey salfan karaan bey cagta sii marinayaan, waxeyse u baahan tahay baraarug iyo feejignaan adag, kuwa marki uu qarax dhaco soo indha caddeeya iyagoo leh Mahad Salaad baa wax dayacay, ha ogaadaan in Mahad iyo Shabaab ka dhexeeyo dagaal aan waxba la isku reebaneyn, Shabaab shan sano lasoo cayiliyay shuuqintooda ayaaba ah shaqo uu qof kasta ku dhiiran karin oo u baahan geesinimo iyo dulqaad fara badan.
Madaxweyne Xasan waxaa ka go'an inuu isugu geeyo awooddiisa inta ugu badan wiiqidda iyo ka adkaanshaha Shabaab sida ugu dhaqsiyaha badan, inta howshaas lagu jiro waxaa dhici doona wax walba oo xumaan shabaabka ku haray sida qaraxyo aargudasho iyo cabsi gelin ah, si shacabku culeys u saaraan dowladda iyagoo leh "bis naga dhaha oo shabaab iska dhaafa waa dhimanaye".
Dalkaan wuxuu ku jiraa gacan la hubo oo cadowgeeda koowaad iyo kan labaad iyo kan saddaxaadba yahay Shabaab, qofkii fulay ah ama sabaatiyo u haayo argagixisada waxaan leenahay albaabkaaga hoos kasoo xiro oo nabad gal
