Postby XidigtaJSL » Thu Jan 18, 2007 7:24 pm
Hargeysa(Geeska – “Adeer aan kuu waramo, kuwan [Dawladda Imbigaati] xoogaaga Tigreega ah wata ayaa imanaya (Somaliland) oo qabsanaya taasi wax caqliga gala maaha, dadkanina dhiig badan ayay u qubeen dib ula soo noqoshada madaxbanaanidooda, imikana diyaar ayay u yihiin inay Qaranimadooda iyo gooni isu taagooda iyo madaxbanaanidooda ay intii loo baahdo dhiig u qubaan. Waxay ila tahay Itoobiyana waxaas ku raaci mayso haddii ay caqligeeda qabto.” Sidaas waxa yidhi Ku simaha Guddoomiyaha xisbiga KULMIYE Md. Maxamuud Saalax Nuur (Fagadhe), oo habeen hore ay waraysi la yeelatay Idaacadda Horn Afrik ee magaalada Muqdisho, isaga oo ka jawaabayay su’aal ahayd: Ciidamada Dawladda TFG oo gacan ka helaya ciidamada Itoobiya miyaan laga yaabin inay Somaliland-na qabsadaan.
Mar la weydiiyay, su’aal ahayd: Haddii Somaliland iyo Itoobiya xidhidh wanaagsani ka dhexeeyo, maad la hadashaan Itoobiya oo aad ka dhaadhiciisaan gooni isu taagiina, waxa uu ku jawaabay “Adeer xidhiidhka naga dhexeeya annaga (Somaliland) iyo Itoobiya iyo xidhiidhka ka dhexeeya Cabdillaahi Yuusuf iyo Itoobiya faraq baa u dhexeeya. Annagu waxaanu u macaamilnaa laba qaran oo madaxbanaan, Cabdillaahi yuusuf-na waa sub-contractor (Qandaraasle Hoose), anaguna si madaxbanaan ayaanu ula macaalimnaa oo laba dawladood oo qaran ah oo deris ah oo aanay colaadi ka dhaxayn oo dantoodu ku jirto inay kala badbaadaan oo la iska ilaabo wixii dhici jiray iyo taariikhihii hore oo danta la raaco oo laba dad oo walaalo ah ayaanu nahay. Itoobiya sida ay ula dhaqanto Cabdillaahi Yuusuf si fiican ayaad u taqaaniin oo uma baahnid inaan kaaga waramo. Haddii Itoobiya danteeda ka garato inay ninkaas (Cabdillaahi Yuusuf) gacan siiso iyada ayay jirtaa oo waxa ay ka hesho ayay leedahay, waxaanu annagu qabnaa inaanay danteedu ku jirin inay umadda Soomaaliyeed ku doorsadaan Cabdillaahi Yuusuf.”
Fagadhe oo ka jawaabayay su’aal ahayd: Madaxweynaha Kenya iyo Raysal-wasaaraha Itoobiya way kulmeen, waxaanay Beesha Caalamku wadaa sidii awood loogu samayn lahaa dawladda ku meel gaadhka ah. Markaas ma moodaa In Itoobiya mawqifkii aad isku ogaydeen iska bedeshay, waxa uu yidhi, “Adeer dawlad waarta oo jirta ajanabi kuuma samayn karo, meel lagaga sameeyo adduunkana ma jirto waxaanay ila tahay kuwa waxaas wadaa laf bay toobin ku hayaan. Xamarna boqol madaxweyne ayaanu ka maqalnay sida Cabdiqaasim, Darmaan, Cali Mahdi, Caydiid waxaas oo dhami waxay noqdeen hal bacaad lagu lisay. Beesha Caalamku maxay tahay?...Waad aragtaa waxa Afgaanistaan ka dhacaya, waad aragtaa Baqdaad waxa ka dhacaya…maxay beesha Caalamku samaynaysaa.”
Isaga oo ka jawaabayay su’aal ah: Haddii adduun weynuhu deeq dhinac walba leh la garab istaago Dawladda Cabdillaahi Yuusuf miyaanay awood u heli doonin inay hanato dhammaan Soomaaliya oo ay ku jirto Somaliland, waxa uu Fagadhe yidhi, “Deeqdan adduun weynuhu bixiyo caalamka saddexaad waxay u tahay nooc minal xashiish. 16 sannadood ayaanu maanta jirnay, askartayada iyo shaqaalahayaga aalad dibadda uga timaadaa ma jirto, wax deeq dibadeed ah oo noo timid ma jirto waxaanan muujinay adkaysi.”
Ugu dambayn Mudane Fagadhe oo la weydiiyay: Maxaa qorshe ah oo aad ka samaysateen waxyaabaha ka socda Soomaaliya, waxa uu yidhi “Waxay ila tahay annagu waanu ku gardaranahay inaanu ka hadalno waxa ka socda Soomaaliya oo dadka jooga ayaa masuuliyadeeda leh iyagaana siday doonaan dadkooda ugu tashanaya annagana waxa lana raaciyay inaanu dhulkayaga iyo dhibaatadiisa la kacaa kufno oo dedaalno oo aanu ka shaqayno oo dawladayada tubtii toosanayd ku jeedino. Annagu laba xisbi oo mucaarad ah ayaanu nahay dawladda waanu toosinaa oo lama dagaalano xabaddana uma qaadano waanan wada hadalnaa wixii qaranka ku saabsana waanu ka wada tashanaa oo maanta saddexdii xisbi oo gacanta is haysta ayaa banaan baxaas sameeyay. Wada tashi joogto ah ayaanu leenahay mar marka qaarkood qaddiyado jira laba aaraah oo kala duwan ayaanu ka leenahay markaanu is afgaran weynana Buurta Sheekh ayaanu tagnaa oo shir turxaan bixin ah qabsanaa.”
Source: Wargeyska Geeska Afrika, Hargeysa, Somaliland
Fagadhe is Dhulbahante Somalilander
what would you say about me if I revieled my other wild fantasies to you 
