Jaaliyadda beesha Habargidir ee London oo si buuxda u taageertay baaqii ay dhawaan odayaasha Hawiye ka soo saareen Muqdisho
Taageero baaqii Beelaha Hawiye – Muqdisho
Guddiga Jaalliyadda Beelaha Habargidir – London (UK), wuxuu si buuxda u taageeraya
Baaqii dhowaan ka soo baxay Beelaha Hawiye ee Muqdisho, kaas oo looga codsanayey
Ciidamada Xabashida ee dalka ku soo duulay iney dhaqso uga baxaan Soomaaliya, taas
oo fure u ah in dalka nabad lagu soo dabaalo.
Waxaa xusid mudan in dalkeenu uu nabad ahaa ka hor inta aysan soo gelin ciidamada
ajnabiga ah, Soomaaliduna ay ku filneed in ay arrimaheeda xallisato, inkasto oo ay
taagnaayeen arrimo siyaasadeed, misana waxaa hubaal ah in xal loo heli lahaa
haddii aan faragelin shisheeye meesha soo gelin.
Waxaan la qabnaa Guurtida Beelaha Hawiye ee baaqa soo saaray maanta, in aysan
jirin beelo Soomaaliyeed oo colaad isku haya, wixii dacdo ah oo dhexmarayna ay ku
haboon yihiin in lagu xalliyo meelo cayiman oo la xiriira arrimo dabiici ah sida
daaqa, biyaha.
Sidaa awgeed, uma maleyneyno in shirka dib-u-heshiisiinta ee DKMG ku baaqday, in
uu noqanayo mid dhab ahaan wax ka beddelaya xaaladda dalka ama lagu xallin karo
khilaafaadka dalka ka taagan halisna ku ah midnimada iyo madaxbannaanid umadda
Soomaaliyeed.
Suurta gal ma aha, lagana akhrisan mayo in ay DKMG ah ay hoggaanka ku meereysato,
meel aan xalku ku jirinna ay waqti uga lumiso shacabka Soomaaliyeed oo
dhibaataysan.
Guddiga Jaalliyadda Habargidir ee London, wuxuu ka dhiidhinaya dar xumadda iyo
silica lagu hayo umadeena, sababna ay u yihiin quwadaha shisheeye oo sida sharci
darrada ah ugu soo duulaya qabsadayna dalkeena hooyo.
Ayadoo ay xanuuun badan ku hayso joogitaanka ciidamada Xabashida iyo kuwa lagu
tilmaamay in ay yihiin ciidan qaran, haseyeeshee ah meleeshiyo beeleed laga soo
daabulay Gobollada Puntland, oo aan wax fikrad ah ka haysan qarannimada, soona
marin tababaro ciidan, halisna ku aha in ay mar kale dalka ka curtaan dagaalo
beeleedyo ay umadda Soomaaliyeed hore faraha uga soo gubatay.
Guddigu wuxuu ka dalbayaa wadammada caalamka in ay umadda Soomaaliyeed u fidiyaan gargaar wax ku ool ah iyo in ay goob joog ka noqdaan dib-u-heshiisiinta lagu
dhisayo dawlad ay umaddu u wada dhan tahay, laguna badbaadiyo midnimada dalkeena.
Beesha Caalamka oo aanan uga maarmin socodsiinta dawladda Soomaaliyeed oo tayo
leh, waxaan ka codsaneynaa in aaney wax hanti ah ku bixin shirk khiyaamo ku dhisan
oo aan waxba u tareyn shacabka Soomaaliyeed raalina ka ahayn.
Waxaa kale oo Guddigu ka dalbayaa Beelaha kale ee Soomaaliyeed in ay taageeraan
Baaqa ka soo baxay Beelaha Hawiye ee Muqdisho, ayadoo xoogga la saarayo sidii
ciidamada Xabashida dalkeena looga saari lahaa.
Guddoomiyaha Jaalliyadda Habargidir – London
Sheikh Bashir Salaad Dhoolayare
